top of page

盒子|小日常



轉載自: 盒子 | 2021.10.27

銀髮族小日常|戰勝淋巴癌死過翻生

63歲銀髮MODEL的第二人生


新節目《小日常》尋找香港人小故事,首集嘉賓係銀髮族模特兒Lisa。Lisa網名叫LISA·1958,生於1958年嘅Lisa,最近忙到癲,有唔同單位邀約合作,最新作品為癌症基金會粉紅革命拍攝,真正展開了第二人生。

2015年,突如其來確診第三期淋巴癌,日日以淚洗面,以為到了生命限期,結果抗癌成功,「2015年檢查咗個幾月,醫生確診我係第三期淋巴癌,腫瘤已經15.6cm。我喺醫院做咗6次標靶、6次化療,再做25次電療, 差唔多用咗半年時間,心情好低落跌咗落谷底!依家死過翻生嘛,之前醫生判咗我死刑,我依家覺得有第二個生命!」

抗癌成功,偶然機會下成為銀髮族模特兒,「喺屋企玩下Facebook、IG,有一日喺IG見到有銀髮model呢個職業,我諗係咪可以試下呢,跟住同個仔講,佢話可以去試下!」一試成功,Lisa開設IG短短幾個月已過千fans追蹤,天涯若比鄰更引來一位來自俄羅斯銀髮族model注意。「喺IG嗰個俄羅斯銀髮model同我講,佢話喺遙遠嘅地方,你係我嘅倒影,我好想同你影相。跟住我就同個仔講,佢話可以㗎,你同佢講,喺差唔多燈光之下,兩個喺不同嘅地方影相,跟住可以用電腦合成!」訪問當日,Lisa正為呢個港俄合體而拍攝。

臨老先嚟做女模,Lisa話做人最緊要有自信,「我大細眼、手指又短,影相之後真係醜樣呀!我覺得自己係夠膽,有呢個勇氣先至得,有自信先至發出呢份美囉!」Lisa心中最靚,始終係香港,「香港好靚呀,特別係80年代,嗰陣我未嚟香港,嚟到香港睇,嘩,啲樓又高、地方又乾淨,維多利亞港真係好靚!依家生活咗廿幾年,我依家又有新嘅人生,我依家覺得香港人好靚,香港嘅年青人,香港所有真正嘅香港人,佢嘅愛心、佢嘅團結、佢嘅正義感,我覺得好靚,所以令到香港更加靚!」想聽聽Lisa嘅心路歷程,即刻睇片啦!

 
撰文:Man |錄影:Wing |剪接:Hin
化妝:Jenny Fung @BeautyZone.HK
場地:Snapro Studio
 

盒子 小日常|專訪花絮

YOYO LAU x LISA·1958


12 次查看0 則留言

相關文章

查看全部

コメント


bottom of page